ਪੇਂਡੂ ਮਹਿਲਾ ਉੱਦਮੀਆਂ ਨੂੰ ਉਤਸ਼ਾਹਿਤ ਕਰਕੇ 6 ਕਰੋੜ ‘ਲੱਖਪਤੀ ਦੀਦੀਆਂ’ ਬਣਾਉਣ ਦੇ ਰਾਸ਼ਟਰੀ ਟੀਚੇ ਨੂੰ ਕੀਤਾ ਜਾਵੇਗਾ ਤੇਜ਼

ਨਵੀਂ ਦਿੱਲੀ, 22 ਅਗਸਤ (ਹਿੰ.ਸ.) : ਪੇਂਡੂ ਵਿਕਾਸ ਮੰਤਰਾਲੇ ਦੀ ਅਧਿਕਾਰ ਪ੍ਰਾਪਤ ਕਮੇਟੀ ਨੇ ਔਰਤਾਂ ਦੀ ਅਗਵਾਈ ਵਾਲੇ ਪੇਂਡੂ ਉੱਦਮਾਂ ਦਾ ਵਿਸਥਾਰ ਕਰਨ ਅਤੇ ਉਨ੍ਹਾਂ ਨੂੰ ਵਿਕਾਸ-ਮੁਖੀ ਕਾਰੋਬਾਰਾਂ ਵਿੱਚ ਬਦਲਣ ਲਈ ਕਈ ਮਹੱਤਵਪੂਰਨ ਪ੍ਰਸਤਾਵਾਂ ਦੀ ਸਮੀਖਿਆ ਕੀਤੀ। ਪੇਂਡੂ ਵਿਕਾਸ ਮੰਤਰਾਲੇ ਦੇ ਅਨੁਸਾਰ ਦੀਨਦਿਆਲ ਅੰਤਯੋਦਯ ਯੋਜਨਾ-ਰਾਸ਼ਟਰੀ ਪੇਂਡੂ ਆਜੀਵਿਕਾ ਮਿਸ਼ਨ ਦੇ ਗੈਰ-ਖੇਤੀ ਆਜੀਵਿਕਾ (ਐੱਨ. ਐੱਫ. ਐੱਲ.) ਹਿੱਸੇ ਦੇ ਤਹਿਤ ਆਯੋਜਿਤ ਇਸ ਮੀਟਿੰਗ ਦੀ ਪ੍ਰਧਾਨਗੀ ਪੇਂਡੂ ਵਿਕਾਸ ਸਕੱਤਰ ਰੋਹਿਤ ਕਾਂਸਲ ਨੇ ਕੀਤੀ। ਇਸ ਪਹਿਲ ਦਾ ਮੁੱਖ ਉਦੇਸ਼ ਪੇਂਡੂ ਮਹਿਲਾ ਉੱਦਮੀਆਂ ਨੂੰ ਉਤਸ਼ਾਹਿਤ ਕਰਕੇ 6 ਕਰੋੜ ‘ਲੱਖਪਤੀ ਦੀਦੀਆਂ’ ਬਣਾਉਣ ਦੇ ਰਾਸ਼ਟਰੀ ਟੀਚੇ ਨੂੰ ਤੇਜ਼ ਕਰਨਾ ਹੈ। ਮੀਟਿੰਗ ਵਿੱਚ ਸੰਯੁਕਤ ਸਕੱਤਰ (ਪੇਂਡੂ ਆਜੀਵਿਕਾ) ਅਮਿਤ ਸ਼ੁਕਲਾ ਅਤੇ ਸਵਾਤੀ ਸ਼ਰਮਾ, ਸੀਨੀਅਰ ਰਾਜ ਅਧਿਕਾਰੀਆਂ ਅਤੇ ਅਕਾਦਮਿਕ ਪ੍ਰਤੀਨਿਧੀਆਂ ਦੇ ਨਾਲ ਸ਼ਾਮਲ ਹੋਏ। ਕਮੇਟੀ ਨੇ ਚਾਰ ਰਾਜਾਂ ਵਿੱਚ ਪ੍ਰਮੁੱਖ ਅਕਾਦਮਿਕ ਸੰਸਥਾਵਾਂ ਨਾਲ ਸਾਂਝੇਦਾਰੀ ਵਿੱਚ ਨਵੇਂ ਇਨਕਿਊਬੇਟਰ ਪ੍ਰੋਗਰਾਮਾਂ ਦੀ ਰੂਪਰੇਖਾ ਤਿਆਰ ਕੀਤੀ। ਇਨ੍ਹਾਂ ਵਿੱਚ ਆਈ. ਆਈ. ਟੀ. ਪਟਨਾ (ਬਿਹਾਰ), ਆਈ. ਆਈ. ਐੱਮ. ਜੰਮੂ (ਜੰਮੂ ਅਤੇ ਕਸ਼ਮੀਰ), ਆਈ. ਆਈ. ਐੱਮ. ਲਖਨਊ (ਉੱਤਰ ਪ੍ਰਦੇਸ਼), ਅਤੇ ਆਈ. ਆਈ. ਟੀ. ਗਾਂਧੀਨਗਰ (ਗੁਜਰਾਤ) ਸ਼ਾਮਲ ਹਨ। ਇਨ੍ਹਾਂ ਪ੍ਰੋਗਰਾਮਾਂ ਰਾਹੀਂ, 600 ਤੋਂ ਵੱਧ ਉੱਚ-ਸੰਭਾਵੀ ਪੇਂਡੂ ਸਵੈ-ਸਹਾਇਤਾ ਸਮੂਹ (ਐੱਸ. ਐੱਚ. ਜੀ.) ਉੱਦਮਾਂ ਨੂੰ ਵਪਾਰਕ ਰਣਨੀਤੀ, ਸਲਾਹ, ਵਿੱਤੀ ਯੋਜਨਾਬੰਦੀ, ਤਕਨਾਲੋਜੀ ਅਤੇ ਬਾਜ਼ਾਰ ਪਹੁੰਚ ਵਿੱਚ ਢਾਂਚਾਗਤ ਸਹਾਇਤਾ ਪ੍ਰਦਾਨ ਕੀਤੀ ਜਾਵੇਗੀ। ਨਵੇਂ ਇਨਕਿਊਬੇਟਰ ਮੁੱਖ ਤੌਰ ’ਤੇ ਭੋਜਨ ਅਤੇ ਖੇਤੀਬਾੜੀ-ਪ੍ਰੋਸੈਸਿੰਗ, ਟੈਕਸਟਾਈਲ ਦਸਤਕਾਰੀ ਅਤੇ ਨਿਰਮਾਣ, ਪ੍ਰਚੂਨ ਸੇਵਾਵਾਂ ਅਤੇ ਸੈਰ-ਸਪਾਟਾ ਗਤੀਵਿਧੀਆਂ ਅਤੇ ਡਿਜੀਟਲ ਉੱਦਮਾਂ ਵਰਗੇ ਖੇਤਰਾਂ ’ਤੇ ਧਿਆਨ ਕੇਂਦਰਿਤ ਕਰਨਗੇ। ਪੱਛਮੀ ਬੰਗਾਲ ਅਤੇ ਗੋਆ ਵਿੱਚ ਗੈਰ-ਖੇਤੀ ਉੱਦਮ ਈਕੋਸਿਸਟਮ ਨੂੰ ਮਜ਼ਬੂਤ ਕਰਨ ਲਈ ਸਟਾਰਟ-ਅੱਪ ਵਿਲੇਜ ਐਂਟਰਪ੍ਰਨਿਓਰਸ਼ਿਪ ਪ੍ਰੋਗਰਾਮ (ਐੱਸ. ਵੀ. ਈ. ਪੀ.) ਨੂੰ ਵਿਸਥਾਰ ਲਈ ਮਨਜ਼ੂਰੀ ਦਿੱਤੀ ਗਈ। ਅਸਾਮ, ਬਿਹਾਰ, ਪੱਛਮੀ ਬੰਗਾਲ ਅਤੇ ਕਰਨਾਟਕ ਦੇ ਸਫਲ ਮਾਡਲਾਂ ਦੀ ਪਾਲਣਾ ਕਰਦੇ ਹੋਏ, 13 ਰਾਜਾਂ ਵਿੱਚ 14 ਇਨਕਿਊਬੇਟਰ ਪ੍ਰੋਗਰਾਮ ਵਰਤਮਾਨ ਵਿੱਚ ਕਾਰਜਸ਼ੀਲ ਹਨ, ਜੋ 2,100 ਤੋਂ ਵੱਧ ਐੱਸ. ਐੱਚ. ਜੀ. ਉੱਦਮਾਂ ਦਾ ਸਮਰਥਨ ਕਰਦੇ ਹਨ। ਇਹ ਪਹਿਲਕਦਮੀ ਪੇਂਡੂ ਔਰਤਾਂ ਨੂੰ ਸਿਰਫ਼ ਗੁਜ਼ਾਰੇ ਦੇ ਕੰਮ ਤੋਂ ਉੱਚ ਟਰਨਓਵਰ, ਮਜ਼ਬੂਤ ਬਾਜ਼ਾਰ ਸਬੰਧਾਂ ਅਤੇ ਵੱਡੇ ਪੱਧਰ ’ਤੇ ਰੁਜ਼ਗਾਰ ਪੈਦਾ ਕਰਨ ਵਾਲੇ ਟਿਕਾਊ ਉੱਦਮਾਂ ਵੱਲ ਲਿਜਾਣ ਲਈ ਤਿਆਰ ਕੀਤੀ ਗਈ ਹੈ।